BUILD BACK BETTER

CEREMONIAL SWITCH-ON HAN DOUBLE CIRCUIT LINE DISTRIBUTION PROJECT HAN ESAMELCO

CEREMONIAL SWITCH-ON HAN DOUBLE CIRCUIT LINE DISTRIBUTION PROJECT HAN ESAMELCO, GINBUHAT HA DOLORES, EASTERN SAMAR

Borongan City – Ginbuhat han Eastern Samar Electric Cooperative, Inc. (ESAMELCO) an ceremonial switch-on han Double Circuit Line Distribution Project tikang ha Taft ngadto ha Dolores dida han April 12, 2023, ha ESAMELCO North Area Office, Dolores, Eastern Samar.

An nasabi nga aktibidad in gintambungan han ESAMELCO General Manager Atty. Jose Michael Edwin S. Amancio, ESAMELCO Board of Directors ha pangunguna ni Board President Reynaldo Gerna, Mayor han bungto han Dolores, Hon. Rodrigo Rivera, ngan pipira nga mga representante han 4Ps Partylist ha pangunguna ni Engr. Dindo Picardal.

Dida han puplunganon ni Dolores Mayor Onoy Rivera, iya iginsabi nga dapat mahibaruan han mga tawo nga kon mayda scheduled nga pagparong han kuryente an ESAMELCO, mayda ginbubuhat an opisina nga pagpakaupay han serbisyo nga maihahatag ngada hit mga konsumidor.

“Problema ngane nira kay bisan kon nagpipinarung-parong, dako la gihap it ira baraydan. Siring ko naman, kay nagamit ka ngane, natural mabayad ka. It iba kasi nga mga tawo dire ini maaram hit rason. Sanglit kinahanglan gud ini mahibaruan hit tawo. Kay ako, dako gud it akon pagpasalamat hit ESAMELCO para hit ira serbisyo ngada hit mga tawo,” dugang pa ni Mayor Onoy.

Upod liwat nga nahiistorya ni Mayor Onoy dida han nasabi nga higayon an hingyap han mga Doloresnon nga mabutngan na hin kuryente ngadto han mga tay-aw nga sitio han bungto.

Positibo naman nga ginkarawat han ESAMELCO an nasabi nga hingyap han mga Doloresnon ngan gin-aghat hira nga magpasa hin resolution an mga hin dadabihan nga barangay para makadto ini han opisina ngan ma-survey.

Iginkalipay naman liwat ni ESAMELCO General Manager Amancio an naging presensiya ni Engr. Dindo Picardal komo representante ni Cong. Marcelino Libanan han 4Ps Partylist, kon diin naging instrumento an nasabi nga higayon para makapag-iristorya an ESAMELCO Management ngan an 4Ps Partylist para hin mga pitad nga makakaupay para han mga konsumidor.

Sumala kan Engr. Picardal, swerte iton probinsya han Eastern Samar kay ha pagkayana, hi Minority Leader Libanan iton in-charge hit bisan ano nga kahimtang hit bug-os nga Samar Island, kon diin upod ini an Probinsiya han Eastern Samar.

“Sanglit dapat singabuton ta ini. Kon naghatag an ESAMELCO hin mga resolution han una nga waray paka-first base [ha Kongreso], siguro yana maghimo ngahaw kita hin resolution. Baliki ta an atun waray ka-realize nga mga inop,” pulong ni Engr. Picardal.

Samtang, ginpresentar naman han buhatan han ESAMELCO dida han nasabi nga ceremonial switch-on pinaagi hin audio visual presentation an mga pagpamatuod tikang ha mga konsumidor kon paano nakabulig ha ira mga panimalay an double circuit line distribution project